HODL និង Take Profit

១. HODL ជាអ្វី?

HODL គឺជាពាក្យពេញនិយមមួយនៅក្នុងសហគមន៍ Crypto ដែលមានន័យថា កាន់ទុក Coin រយៈពេលវែង ទោះបីទីផ្សារឡើង ឬចុះក្នុងរយៈពេលខ្លីក៏ដោយ។ វាមកពីពាក្យ “Hold” ប៉ុន្តែក្លាយជាស្លោកមួយសម្រាប់អ្នកជឿជាក់លើការកើនឡើងរយៈពេលវែង។

អ្នកដែលប្រើយុទ្ធសាស្ត្រ HODL ជាទូទៅជឿថា Bitcoin ឬ Coin មួយចំនួន មានតម្លៃខ្ពស់ជាងមុននៅអនាគត។ ដូច្នេះ ពួកគេមិនព្យាយាមចូលចេញជាញឹកញាប់ទេ ប៉ុន្តែផ្តោតលើការកាន់ទុកក្នុងរយៈពេលវែង។

HODL សមស្របសម្រាប់អ្នកដែលមិនមានពេលមើល chart រាល់ថ្ងៃ ឬមិនចង់រងសម្ពាធពីការឡើងចុះខ្លីៗរបស់ទីផ្សារ។

២. Take Profit ជាអ្វី?

Take Profit មានន័យថា លក់យកចំណេញ នៅពេលតម្លៃដល់គោលដៅដែលអ្នកបានគ្រោងទុក។ វាជាវិធីសំខាន់ក្នុងការការពារចំណេញ ព្រោះទីផ្សារ Crypto អាចឡើងខ្លាំង ហើយធ្លាក់វិញយ៉ាងលឿន។

ឧទាហរណ៍ បើអ្នកទិញ Coin មួយនៅតម្លៃ $100 ហើយអ្នកមានផែនការថា នឹងលក់ខ្លះនៅ $130 ឬ $150 នោះគឺជាការប្រើ Take Profit។ វាជួយអោយអ្នកមិនរង់ចាំយូរពេករហូតតម្លៃធ្លាក់វិញ។

៣. ហេតុអ្វី HODL និង Take Profit សំខាន់?

មនុស្សជាច្រើនខាតមិនមែនព្រោះជ្រើស Coin ខុសប៉ុណ្ណោះទេ ប៉ុន្តែព្រោះពួកគេមិនមានផែនការចេញពីទីផ្សារ។ ពេលតម្លៃឡើង គេអាចមានអារម្មណ៍ថាវានឹងឡើងបន្តទៀត ហើយមិនព្រមលក់។ បន្ទាប់មកទីផ្សារធ្លាក់វិញ ធ្វើអោយចំណេញដែលធ្លាប់មានបាត់ទៅ។

ការយល់ពី HODL និង Take Profit នឹងជួយអោយអ្នកសម្រេចចិត្តបានច្បាស់ថា Coin ណាអ្នកចង់កាន់យូរៗ និង Coin ណាអ្នកគួរលក់ចេញតាមគោលដៅ។

៤. ខុសគ្នារវាង HODL និង Take Profit

ទាំងពីរយុទ្ធសាស្ត្រនេះមិនមែនប្រឆាំងគ្នាទេ ប៉ុន្តែអាចប្រើរួមគ្នាបាន។ HODL ផ្តោតលើការកាន់ទុករយៈពេលវែង ខណៈ Take Profit ផ្តោតលើការចាក់សោចំណេញពេលតម្លៃឡើងដល់គោលដៅ។

• HODL៖ សមស្របសម្រាប់អ្នកជឿលើអនាគតរយៈពេលវែងរបស់ Coin
• Take Profit៖ សមស្របសម្រាប់ការការពារចំណេញ និងគ្រប់គ្រងហានិភ័យ
• HODL + Take Profit៖ អាចកាន់ភាគមួយ និងលក់ភាគមួយនៅពេលតម្លៃឡើង

យុទ្ធសាស្ត្រដែលមានតុល្យភាពជាងគេជាញឹកញាប់ គឺមិនលក់ទាំងអស់ និងមិនកាន់ទាំងអស់។ អ្នកអាចបែងចែក Portfolio ជាផ្នែកៗ ដើម្បីអនុវត្តទាំង HODL និង Take Profit ក្នុងពេលតែមួយ។

៥. ឧទាហរណ៍ជាក់ស្តែង

សូមស្រមៃថា អ្នកទិញ Bitcoin នៅ $50,000។ បន្ទាប់មកតម្លៃឡើងដល់ $70,000។ ប្រសិនបើអ្នកជាអ្នក HODL អ្នកអាចបន្តកាន់ទុក ព្រោះជឿថា នៅអនាគតវាអាចឡើងខ្ពស់ជាងនេះទៀត។

ប៉ុន្តែប្រសិនបើអ្នកមានផែនការ Take Profit អ្នកអាចលក់ 20% ឬ 30% នៅពេលដល់គោលដៅ ដើម្បីយកដើមទុន ឬចំណេញខ្លះចេញមកសិន។ វិធីនេះជួយអោយអ្នកមានទំនុកចិត្ត និងកាត់បន្ថយសម្ពាធផ្លូវចិត្ត។

៦. របៀបកំណត់គោលដៅ Take Profit

មុនចូលវិនិយោគ អ្នកគួរតែសួរខ្លួនឯងជាមុនថា៖ “បើតម្លៃឡើងដល់កម្រិតណា ខ្ញុំនឹងលក់ខ្លះ?” ការកំណត់គោលដៅជាមុន ធ្វើអោយអ្នកមានវិន័យជាងមុន។

• កំណត់គោលដៅទី១ ដើម្បីយកដើមទុនវិញ
• កំណត់គោលដៅទី២ ដើម្បីលក់ចំណេញខ្លះ
• ទុកភាគមួយសម្រាប់ HODL រយៈពេលវែង
• កុំផ្លាស់ប្តូរផែនការរាល់ពេលឃើញទីផ្សារឡើងខ្លាំង

Take Profit មិនចាំបាច់មានតែចំណុចតែមួយទេ។ អ្នកអាចលក់ជាជំហានៗ ដើម្បីកាត់បន្ថយហានិភ័យ និងរក្សាឱកាសចំណេញបន្ថែម។

៧. កំហុសដែលគេធ្វើញឹកញាប់

នៅពេលទីផ្សារឡើងខ្លាំង មនុស្សជាច្រើនមិនព្រមលក់ទេ ព្រោះគិតថាវានឹងឡើងបន្តទៀត។ តែពេលទីផ្សារចុះវិញ គេក៏មានអារម្មណ៍ភ័យ ហើយលក់នៅចំណុចមិនល្អ។ នេះជាកំហុសដែលកើតឡើងញឹកញាប់បំផុត។

• មិនមានផែនការ Take Profit មុនចូលទីផ្សារ
• កាន់ Coin ដោយគ្រាន់តែសង្ឃឹម មិនមែនដោយវិភាគ
• លក់ចេញទាំងអស់ពេកលឿនពេលតម្លៃឡើងតិចៗ
• កាន់ទុកទាំងអស់ពេកយូរ រហូតបាត់ចំណេញ
• សម្រេចចិត្តតាមអារម្មណ៍ ឬតាម social media

សូមត្រៀមខ្លួនសម្រាប់មេរៀនបន្ទាប់៖ “មេរៀនទី១៣៖ Portfolio Diversification”។