FOREX MASTERY • LESSON ៣

Pip, Lot និង Spread ជាអ្វី?

by Sot Dimong

១៩ សីហា ២០២៦

ស្គាល់ Pip, Lot, Spread និងគោលគំនិតមូលដ្ឋានសំខាន់ៗ។ មេរៀននេះនឹងជួយអោយអ្នកចាប់ផ្តើម យល់ថា តម្លៃនៅលើ Forex ផ្លាស់ទីដោយរបៀបណា ទំហំការជួញដូរគណនាយ៉ាងដូចម្តេច ហើយហេតុអ្វីបានជាការចំណាយតូចមួយដែលហៅថា Spread មានឥទ្ធិពលលើចំណេញ និងខាតរបស់អ្នក។

រយៈពេលប្រហែល ១៥ នាទី

Forex Mission • Level 1 • Forex Foundations 📊 Forex Starter

0 XP

ចាប់ផ្តើម

សេចក្តីផ្តើម
បន្ទាប់ពីអ្នកបានស្គាល់ Currency Pair និងរបៀបអានតម្លៃរួចហើយ ជំហានសំខាន់បន្ទាប់គឺ ត្រូវយល់ពីពាក្យមូលដ្ឋានដែលគេប្រើញឹកញាប់បំផុតនៅក្នុង Forex គឺ Pip, Lot និង Spread។ ពាក្យទាំងបីនេះជាគន្លឹះសំខាន់សម្រាប់យល់ពីការផ្លាស់ទីតម្លៃ ការគណនាចំណេញខាត និងការជ្រើសទំហំការបើកបញ្ជា។

គោលបំណងនៃមេរៀននេះ

បន្ទាប់ពីរៀនចប់ អ្នកគួរតែអាចពន្យល់បានថា Pip ជាអ្វី, Lot ជាអ្វី, Spread ជាអ្វី, ដឹងភាពខុសគ្នារវាង lot size នីមួយៗ និងយល់ថាពាក្យទាំងនេះពាក់ព័ន្ធនឹងការជួញដូរពិតយ៉ាងដូចម្តេច។

១. Pip ជាអ្វី?

Pip គឺជាឯកតាតូចមួយសម្រាប់វាស់ចលនាតម្លៃនៅក្នុង Forex។ នៅពេលតម្លៃរូបិយប័ណ្ណឡើង ឬចុះបន្តិច Trader ភាគច្រើនមិននិយាយថា “ឡើង 0.0001” ឬ “ចុះ 0.0001” ទេ ប៉ុន្តែគេនិយាយថា “ឡើង 1 pip” ឬ “ចុះ 1 pip”។

សម្រាប់គូរូបិយប័ណ្ណភាគច្រើន ដូចជា EUR/USD ឬ GBP/USD, 1 pip ស្មើនឹង 0.0001។ ឧទាហរណ៍ ប្រសិនបើ EUR/USD ផ្លាស់ពី 1.0850 ទៅ 1.0851 នោះមានន័យថាតម្លៃបានឡើង 1 pip។

សម្រាប់គូខ្លះដែលមាន JPY ដូចជា USD/JPY តម្លៃ pip ខុសបន្តិច។ ជាទូទៅ 1 pip ស្មើនឹង 0.01។ ឧទាហរណ៍ ប្រសិនបើ USD/JPY ផ្លាស់ពី 150.20 ទៅ 150.21 នោះគឺឡើង 1 pip ដែរ។

Lesson Note: Pip គឺជាមូលដ្ឋានសម្រាប់គណនាចំណេញ ខាត និងវាស់ថាតម្លៃបានផ្លាស់ទីប៉ុន្មាន។ បើអ្នកមិនយល់ពី pip ទេ អ្នកនឹងពិបាកយល់ពី Risk និង Reward នៅពេលជួញដូរពិត។

២. ឧទាហរណ៍ការអាន Pip

តោះមើលឧទាហរណ៍ងាយៗ៖

EUR/USD ពី 1.1000 ទៅ 1.1010 = ឡើង 10 pips
GBP/USD ពី 1.2705 ទៅ 1.2695 = ចុះ 10 pips
USD/JPY ពី 149.80 ទៅ 150.00 = ឡើង 20 pips

តាមរយៈឧទាហរណ៍នេះ អ្នកអាចមើលឃើញថា Pip មិនមែនជាចំនួនលុយទេ ប៉ុន្តែជាចំនួនចលនាតម្លៃ។ ចំនួនលុយដែលអ្នកចំណេញ ឬខាតពីចំនួន pip ទាំងនោះ អាស្រ័យលើ Lot size ដែលអ្នកប្រើ។

៣. Lot ជាអ្វី?

Lot គឺជាឯកតាសម្រាប់វាស់ទំហំការជួញដូរ។ នៅពេលអ្នកបើក Buy ឬ Sell មួយ អ្នកត្រូវជ្រើសថាចង់បើកទំហំប៉ុន្មាន។ ទំហំនោះត្រូវបានបង្ហាញជា lot។

នៅក្នុង Forex មាន lot ទំហំខុសៗគ្នា ដែលអ្នកចាប់ផ្តើមគួរស្គាល់៖

1.00 lot = Standard Lot
0.10 lot = Mini Lot
0.01 lot = Micro Lot

អ្នកអាចយល់សាមញ្ញថា lot គឺជាកម្រិតធំតូចនៃការជួញដូរ។ បើ lot ធំ ចលនាតម្លៃតែបន្តិចក៏អាចបង្កើតចំណេញ ឬខាតច្រើន។ បើ lot តូច ការប្រែប្រួលដូចគ្នានឹងមានឥទ្ធិពលលើគណនីតិចជាង។

៤. ហេតុអ្វី Lot សំខាន់?

Lot សំខាន់ណាស់ ព្រោះវាកំណត់ថា 1 pip មានតម្លៃប៉ុន្មានសម្រាប់ការជួញដូររបស់អ្នក។ ទោះបីតម្លៃទីផ្សារផ្លាស់ទីដូចគ្នាក៏ដោយ បើអ្នកប្រើ lot ធំ អ្នកនឹងចំណេញ ឬខាតលឿនជាងអ្នកប្រើ lot តូច។

សម្រាប់ការយល់ដំបូង អ្នកអាចគិតថា៖

0.01 lot = ហានិភ័យតូចជាង
0.10 lot = មធ្យម
1.00 lot = ធំ និងមានហានិភ័យខ្លាំងជាង

នេះហើយជាមូលហេតុដែលអ្នកចាប់ផ្តើមភាគច្រើនគួរចាប់ផ្តើមពី lot តូច ដើម្បីហ្វឹកហាត់យល់ពីទីផ្សារ និងការគ្រប់គ្រងអារម្មណ៍សិន មុនពេលប្រើទំហំធំ។

៥. Spread ជាអ្វី?

Spread គឺជាគម្លាតរវាងតម្លៃ Buy និង Sell។ នៅពេលអ្នកមើលតម្លៃនៅលើ broker អ្នកនឹងឃើញថា តម្លៃទិញ និងតម្លៃលក់មិនស្មើគ្នាទេ។ គម្លាតតូចមួយនោះហៅថា Spread។

ឧទាហរណ៍ បើ EUR/USD មាន៖

Buy = 1.1002
Sell = 1.1000

គម្លាតរវាងតម្លៃទាំងពីរនេះគឺ 2 pips។ នេះមានន័យថា នៅពេលអ្នកបើកបញ្ជាភ្លាម អ្នកចាប់ផ្តើមជាមួយការខាតតិចៗមុនសិនស្មើនឹង spread ហើយត្រូវរង់ចាំអោយតម្លៃរត់ទៅទិសអ្នក ដើម្បីឆ្លងកាត់ spread សិន មុននឹងទៅដល់ចំណេញ។

៦. ហេតុអ្វី Spread សំខាន់សម្រាប់អ្នកចាប់ផ្តើម?

Trader ថ្មីៗជាច្រើនមើលរំលង spread ប៉ុន្តែវាសំខាន់ណាស់។ ប្រសិនបើអ្នកចូលចេញទីផ្សារញឹកញាប់ spread អាចបន្ថែមការចំណាយរបស់អ្នកជាបន្តបន្ទាប់។ ពេលខ្លះ ទោះបីអ្នកទស្សន៍ទាយទិសត្រឹមត្រូវក៏ដោយ បើទីផ្សាររត់តិចពេក អ្នកអាចមិនទាន់ចំណេញ ព្រោះត្រូវឆ្លងកាត់ spread ជាមុនសិន។

ជាទូទៅ គូរូបិយប័ណ្ណធំៗ ដូចជា EUR/USD ឬ GBP/USD ជាញឹកញាប់មាន spread ទាបជាងគូខ្លះផ្សេងទៀត។ តែ spread ក៏អាចធំឡើងនៅពេលទីផ្សារមានភាពប្រែប្រួលខ្លាំង, ពេលមានព័ត៌មានសំខាន់ ឬពេល liquidity ទាប។

ចំណាំសំខាន់: Spread មិនមែនជាចំណេញរបស់អ្នកទេ ប៉ុន្តែជាចំណាយដំបូងមួយក្នុងការជួញដូរ។ ដូច្នេះ អ្នកត្រូវចេះសង្កេត spread មុនបើកបញ្ជា ជាពិសេសបើអ្នកចង់ scalp ឬ trade រយៈពេលខ្លី។

៧. ទំនាក់ទំនងរវាង Pip, Lot និង Spread

ពាក្យទាំងបីនេះធ្វើការជាមួយគ្នា៖

Pip = វាស់ចលនាតម្លៃ
Lot = វាស់ទំហំការជួញដូរ
Spread = គម្លាតតម្លៃ Buy និង Sell ដែលជាចំណាយដំបូង

ឧទាហរណ៍ បើអ្នកបើកបញ្ជា 0.01 lot ហើយទីផ្សារឡើង 20 pips អ្នកអាចមានចំណេញតិចមួយ។ ប៉ុន្តែបើអ្នកបើក 1.00 lot ហើយទីផ្សារឡើង 20 pips ដូចគ្នា ចំណេញនឹងធំជាងច្រើន។ ទោះជាយ៉ាងណា បើទីផ្សារចុះវិញ ការខាតក៏ធំឡើងដូចគ្នា។

ហើយបើ spread ជា 2 pips នោះចលនាតម្លៃ 20 pips ពិតប្រាកដសម្រាប់អ្នក មិនមែនចាប់ផ្តើមពីសូន្យទេ តែត្រូវដកចេញ spread ជាមុនសិន។

៨. ឧទាហរណ៍ជាក់ស្តែងសម្រាប់ការយល់ងាយ

សូមស្រមៃថា អ្នកបើក Buy EUR/USD នៅតម្លៃ 1.1000 ជាមួយ 0.01 lot ហើយ spread = 2 pips។ បន្ទាប់មក តម្លៃឡើងទៅ 1.1010។ នេះមានន័យថា ទីផ្សារឡើង 10 pips ប៉ុន្តែអ្នកត្រូវឆ្លងកាត់ spread 2 pips មុនសិន ដូច្នេះចលនាដែលមានប្រយោជន៍ពិតប្រាកដសម្រាប់អ្នក គឺតិចជាង 10 pips បន្តិច។

បើអ្នកបើក lot ធំជាងនេះ ចំណេញនឹងកើនឡើង ប៉ុន្តែហានិភ័យក៏កើនដូចគ្នា។ ដូច្នេះការយល់ពី pip, lot និង spread មិនមែនសម្រាប់ចងនិយមន័យប៉ុណ្ណោះទេ ប៉ុន្តែសម្រាប់សម្រេចចិត្តពិតនៅពេលជួញដូរ។

៩. អ្វីដែលអ្នកចាប់ផ្តើមគួរចងចាំ

សង្ខេបមេរៀនទី៣:

Pip គឺជាឯកតាវាស់ចលនាតម្លៃនៅក្នុង Forex។
សម្រាប់គូភាគច្រើន 1 pip = 0.0001 ហើយសម្រាប់គូ JPY ជាទូទៅ 1 pip = 0.01។
Lot គឺជាទំហំការជួញដូរ ដែលកំណត់ថាចំណេញ និងខាតធំតូចប៉ុន្មាន។
Spread គឺជាគម្លាតរវាងតម្លៃ Buy និង Sell។
Spread ជាចំណាយដំបូងដែលអ្នកត្រូវឆ្លងកាត់ មុនពេលឈានទៅរកចំណេញ។
Pip, Lot និង Spread ជាពាក្យមូលដ្ឋានដែលត្រូវយល់អោយច្បាស់ មុនរៀនជំហានបន្ទាប់។

១០. សម្រាប់អ្នកចាប់ផ្តើម

បើអ្នកទើបចាប់ផ្តើម សូមកុំផ្តោតតែលើការរកចំណេញរហ័ស។ អ្វីដែលសំខាន់ជាងគេគឺ ត្រូវយល់អោយច្បាស់ថា តម្លៃផ្លាស់ទីប៉ុន្មាន pip, អ្នកបើកទំហំប៉ុន្មាន lot និង spread ប៉ះពាល់ដល់ការជួញដូររបស់អ្នកយ៉ាងដូចម្តេច។

ការយល់ច្បាស់លើគោលគំនិតទាំងនេះ នឹងជួយអោយអ្នកមិនច្រឡំពេលរៀនពី Order, Stop Loss, Take Profit និងការគ្រប់គ្រងហានិភ័យនៅមេរៀនបន្ទាប់ៗ។

សូមត្រៀមខ្លួនសម្រាប់មេរៀនបន្ទាប់៖ “មេរៀនទី៤៖ ប្រភេទ Order ក្នុង Forex”។

LIVE FOREX LAB • SIMULATOR

សាកល្បងលំហូរប្រតិបត្តិការ Forex ជាក់ស្តែង

READY

ជ្រើសរើស Scenario ខាងក្រោមដើម្បីមើលការវិភាគ ចលនាតម្លៃ និងលទ្ធផលគណនាទីផ្សារជាក់ស្តែង។

Standard Lot (1.0) 100,000 Units Volume

Market Engine Analyze → Risk → Execute

$10 per Pip EUR/USD Movement

លទ្ធផលគំរូ ៖ ចលនាតម្លៃ 20 Pips លើទំហំ 1.0 Standard Lot ស្មើនឹងប្រាក់ចំណេញ ឬខាត $200 USD ។

វិធានមាស & យុទ្ធសាស្ត្រអនុវត្តជាក់ស្តែង

MASTER TRADING RULE • វិធានប្រតិបត្តិការគន្លឹះ

វិធានមាសទី៣ ៖ កុំចូល Trade ដោយគ្រាន់តែទាយទំហំ Lot! ត្រូវគណនាតម្លៃ Pip ជានិច្ច ៖ 1.0 Lot = $10/Pip, 0.10 Lot = $1/Pip, 0.01 Lot = $0.10/Pip។ កំណត់ទំហំ Lot ឱ្យសមស្របនឹងដើមទុន ដើម្បីកុំឱ្យខាតបង់ធ្ងន់ធ្ងរ!

ពិនិត្យការយល់ដឹង (Knowledge Check)

QUIZ ខ្លី

ប្រសិនបើអ្នកបើកបញ្ជា 1.0 Standard Lot លើ EUR/USD តើចលនាតម្លៃ ១ Pip ស្មើនឹងទឹកប្រាក់ប៉ុន្មាន?

ចម្លើយត្រឹមត្រូវ ៖ នៅលើគូដែលមាន USD ជា Quote Currency ទំហំ 1.0 Standard Lot (100,000 units) មានតម្លៃ $10 ក្នុងមួយ Pip (0.10 Lot = $1/Pip, 0.01 Lot = $0.10/Pip)។

ចំណុចគន្លឹះត្រូវចងចាំក្នុងមេរៀននេះ

Pip (Percentage in Point) គឺជាខ្នាតរង្វាស់នៃការប្រែប្រួលតម្លៃ (ខ្ទង់ទសភាគទី ៤ លើគូទូទៅ និងទី ២ លើ JPY)។
Lot Size កំណត់ទំហំទឹកប្រាក់ជួញដូរ ៖ Standard (1.0), Mini (0.10) និង Micro (0.01)។
1.0 Lot លើ EUR/USD ស្មើនឹង $10/Pip, 0.10 Lot = $1/Pip, 0.01 Lot = $0.10/Pip។
Spread គឺជាគម្លាតរវាងតម្លៃ Bid និង Ask ដែលជាកម្រៃសេវារបស់ Broker។
ត្រូវគណនា Pip Value និង Lot Size ឱ្យត្រូវមុនពេលចូល Trade ដើម្បីគ្រប់គ្រងហានិភ័យ។

MISSION COMPLETED